په‌كه‌كه‌: سوپای‌ توركیا چه‌كی‌ كیمیایی به‌كارهێناوه‌

په‌كه‌كه‌ رایده‌گه‌یه‌نێت: له‌شه‌رێكی‌ گه‌ریلاكانیان له‌گه‌ڵ‌ سوپای‌ توركیاداو له‌ئه‌نجامی‌ به‌كارهێنانی‌ چه‌كی‌ كیمیایی له‌لایه‌ن سوپاوه‌ 2 گه‌ریلایان گیانی‌ له‌ده‌ستداوه‌و به‌رپرسێكی‌ به‌ده‌په‌ش ده‌ڵێت گومان ده‌كرێت چه‌كی‌ كیمیایی به‌كار هاتبێت.
ئاژانسی‌ هه‌واڵی‌ فورات له‌زاری‌ به‌رپرسانی‌ په‌كه‌كه‌وه‌ بڵاویكردۆته‌وه‌:به‌ره‌به‌یانی‌ دووشه‌ممه‌ شه‌رێك له‌نێوان گه‌ریلاكانی‌ پارتی‌ كرێكارانی‌ كوردستان و سوپای‌ توركیادا له‌ ناوچه‌ی‌ سێگۆشه‌ی‌ (لیجه‌, هێنێ‌, دارا هێنێی‌) له‌ ئامه‌د رویداوه‌و, له‌و شه‌ڕه‌دا سوپای‌ توركیا چه‌كی‌ كیمیایی به‌كارهێناوه‌و به‌و هۆیه‌وه‌ 2 گه‌ریلا گیانیان له‌ده‌ستداوه‌.
ئاژانسی‌ فورات ئه‌وه‌شی‌ بڵاوكردۆته‌وه‌: ژماره‌یه‌كی‌ زۆر له‌ هێلیكۆپته‌ری‌ جۆری‌ (سكۆرسكی‌ و كوبرا) بۆردومانی‌ گونده‌كانی‌ ناوچه‌كه‌یان كردووه‌و, به‌پێی‌ لێدوانی‌ هاوڵاتیانی‌ ئه‌و ناوچانه‌ش ته‌رمی‌ دوو گه‌ریلاكه‌ی‌ په‌كه‌كه‌ بۆنێكی‌ سه‌یریان لێهاتووه‌, كه‌ مرۆڤ توشی‌ هێڵنجدان و سه‌رێشه‌ ده‌كات.
ئاشكراشیكردووه‌: زوبێده‌ زومروت - هاوسه‌رۆكی‌ به‌ده‌په‌ له‌ ئامه‌د دوای‌ ئه‌وه‌ی‌ له‌گه‌ڵ‌ وه‌فدێكی‌ پارته‌كه‌ی‌ سه‌ردانی‌ ناوچه‌كه‌یان كردووه‌, رایگه‌یاندووه‌: جل و به‌رگی‌ گه‌ریلاكان بۆنێكی‌ سه‌یر و زۆر ناخۆشی‌ لێهاتووه‌, بۆیه‌ گومانده‌كرێت چه‌كی‌ كیمیایی به‌كار هاتبێت.