له كۆتایی ئه‌م مانگه‌وه له گه‌رمیان ده‌ست ده‌كرێت به دابه‌شكردنی كارتی سووته‌مه‌نی ئۆتۆمبێل به‌سه‌ر شۆفێرانی قه‌زای كه‌لار و ده‌وروبه‌ری، بۆ ئه‌و مه‌به‌سته‌ش، سێ لیژنه پێكهێنراوه، جگه له لیژنه‌ی تایبه‌ت بۆ ناحییه‌كان.
ملازمی یه‌ك كارزان مه‌جید، به‌رپرسی به‌شی راگه‌یاندن له به‌ڕێوه‌به‌رایه‌تی هاتوچۆی گه‌رمیان، به (خه‌ندان) ی رایگه‌یاند: به‌هه‌ماهه‌نگی له‌گه‌ڵ نووسینگه‌ی دابه‌شكردنی سووته‌مه‌نی كه‌لار، له كۆتایی ئه‌م مانگه‌وه
له (31ی كانوونی دووه‌م) ده‌ست به‌دابه‌شكردنی كارتی سووته‌مه‌نی ئۆتۆمبێل به‌سه‌ر شۆفێراندا، ده‌كه‌ین.
روونشیكرده‌وه، بۆ ئه‌و مه‌به‌سته سێ لیژنه‌یان پێكهێناوه، لیژنه‌یه‌ك له به‌نزینخانه‌ی ساڵح ئاغا بۆ ئۆتۆمبێلی جۆری تاكسی، كیای به‌نزین، له‌گه‌ڵ ئۆتۆمبێلی تایبه‌ت، لیژنه‌یه‌كی دیكه له به‌نزینخانه‌ی مرواری، بۆ ئۆتۆمبێلی جۆری پیكاپ و تایبه‌ت، لیژنه‌ی سێیه‌م له به‌نزینخانه‌ی هاوچه‌رخ، بۆ ئۆتۆمبێلی تایبه‌ت.
سه‌باره‌ت به‌و ئۆتۆمبێلانه‌ش به گاز كارده‌كه‌ن، ملازم كارزان، وتی: "تا ئێستا لیژنه بۆ ئه‌و مه‌به‌سته پێكنه‌هێنراوه‌‌و دواتر ئه‌وه‌ش راده‌گه‌یه‌نرێت، بۆ ناحییه‌كانیش لیژنه‌ی تایبه‌ت پێكده‌هێنرێت".
به‌رپرسی به‌شی راگه‌یاندنی هاتوچۆی گه‌رمیان، پێداویستییه‌كانی ده‌ركردنی كارتی سووته‌مه‌نی ئۆتۆمبێلی خسته‌ڕوو، كه بریتین له : ساڵانه‌ی ئۆتۆمبێل له‌گه‌ڵ كۆپییه‌كیدا، كارتی زانیاری ئۆتۆمبێل له‌گه‌ڵ وێنه‌یه‌كیدا، فۆرمی خۆراك له‌گه‌ڵ وێنه‌یه‌كیدا، پێناسی باری شارستانی، پشتگیری پۆلیسی هاتوچۆ كه هه‌ر له شوێنی ده‌ركردنی كارته‌كه‌دا ده‌كرێت.
ملازم كارزان، وتیشی: "پێویسته ئۆتۆمبێله‌كانی فه‌رمانگه‌كان، پشتگیری فه‌رمانگه‌كانیان بهێنن، له ده‌ركردنی كارتی سووته‌مه‌نیشدا ئه‌وله‌وییه‌تیش ده‌درێت به‌و ئۆتۆمبێلانه‌ی تابلۆكانیان سێ پارێزگاكه‌ی هه‌رێمه‌‌و نرخی یه‌ك كارتیش به سێ هه‌زار دیناره".
