ئەمشەو لەگەڕەكی بەختیاری شاری سلێمانی، پیاوێك لە رووداوێكی نادیاردا بە چەقۆ و فیشەك كوژرا.
سەرچاوەیەك لە پۆلیسی سلێمانی، بە خەندانی راگەیاند: ئەمشەو (23ی شوباتی 2013) پیاوێكی 41 ساڵا بەناوی (ت. م. ع)، لەبەردەم ماڵەكەی خۆیاندا لەلایەن كەسانی نەناسراوەوە كوژراوە.سەرچاوەكە وتی: "ئەو پیاوە بە چەقۆ و فیشەكیش كوژراوە، چونكە ئاسەواری چەقۆ و دوو فیشەكی پێوە بووە، كە فیشەكەكان بەر سەری و سكی كەوتووە".
وتیشی: "لەكاتی گەیاندنی بە نەخۆشخانە لە رێگادا گیانی لەدەستداوە".
سەرچاوەكە ئاماژەی بەوەشدا: ئەو پیاوە كاری دەستگێڕی گۆڕینەوەی دراو دەكات لە بازاڕی سلێمانی.
ئەوەشی خستەڕوو: "بەوپێیەی ئەو پیاوە پارەی پێبووە پێدەچێت بۆ بەدەستهێنانی پارە لێی كوشتبێتیان".
رونیشیكردەوە، تائێستا بەتەواوی نازانرێت هۆكاری كوشتنەكەی چیە‌و لێكۆڵینەوەش لە رووداوەكە دەستیپێكردووە
