به‌هۆی ته‌قینه‌وه‌ی بتڵێك غازی بچووكه له قاتی دووی نه‌خۆشخانه‌ی منداڵانی سلێمانی، ئاگر له‌ناو نه‌خۆشخانه‌كه ده‌كه‌وێته‌وه و به‌هۆیه‌وه نه‌خۆشخانه‌كه چۆڵ ده‌كرێت.
دكتۆر هێرش حه‌مه‌ڕه‌ئوف به‌ڕێوه‌به‌ری نه‌خۆشخانه‌ی منداڵانی سلێمانی به سایتی خه‌ندانی راگه‌یاند: به‌هۆی ته‌قینه‌وه‌ی بتڵێك غازی بچووك له ژووری فایلاتی قاتی دووی نه‌خۆشخانه‌كه غازێكی زۆر له‌ناو نه‌خۆشخانه‌كه‌دا بڵاوبووه‌ته‌وه.
دكتۆر هێرش وتی: "له‌به‌رئه‌وه‌ی نه‌خۆشخانه‌كه‌مان كۆنه و سیستمی هه‌واگۆڕكێی نییه، ناچارین هه‌رچوار قاته‌كه چۆڵ بكه‌ین".
به‌ڕێوه‌به‌ری نه‌خۆشخانه‌ی منداڵانی سلێمانی ئه‌وه‌شی خسته‌ڕوو كه له‌ئێستادا هه‌موو نه‌خۆشه‌كانی ناو نه‌خۆشخانه‌كه هاتوونه‌ته خواره‌وه كه ژماره‌یان له‌نێوان 100 بۆ 200 نه‌خۆش ده‌بێت و كارمه‌نده‌كانیش هاتوونه‌ته خواره‌وه".
وتیشی: "له ئه‌نجامی ته‌قینه‌وه‌ی بتڵه غازه‌كه ئاگر كه‌وتووه‌ته‌وه و به‌هۆیه‌وه كارمه‌ندێك كه له ژووری فایلات بووه قاچی به سووكی سووتاوه"، ئه‌وه‌شی خسته‌ڕوو كه دوو كارمه‌ندی نه‌خۆشخانه‌كه‌ش كه یارمه‌تی نه‌خۆشه‌كانیان داوه بۆ ئه‌وه‌ی بیناكه چۆڵ بكه‌ن، غاز لێی داون.
په‌یامنێریشمان له شوێنی رووداوه‌كه وتی: له‌ئێستادا قه‌ره‌باڵغییه‌كی زۆر له‌به‌رده‌م بینای نه‌خۆشخانه‌كه‌دا هه‌یه و كه‌سوكاری ئه‌و منداڵانه‌ی له نه‌خۆشخانه‌كه كه‌وتبوون له‌به‌رده‌م نه‌خۆشخانه‌كه‌دان .
