كه‌ركوك: ته‌رمی گه‌نجێك ده‌دۆزرێته‌وه‌

هێزه‌كانی پۆلیس له‌ گه‌ره‌كێكی شاری كه‌ركوك ته‌رمی گه‌نجێكی ته‌مه‌ن (33) ساڵیان به‌ كوژراوی له‌ ناو هه‌یكه‌لی خانوویه‌كدا دۆزییه‌وه‌، كه‌ ئاسه‌واری گولله‌ی پێوه‌یه‌.

سه‌رچاوه‌یه‌ك له‌ به‌رێوه‌به‌رایه‌تی پۆلیسی كه‌ركوك به‌ (خه‌ندان)ی راگه‌یاند: ئه‌مرۆ سێشه‌ممه‌ هێزه‌كانی پۆلیسی كه‌ركوك ته‌رمی گه‌نجێكی ته‌مه‌ن (33)ساڵیان به‌ كوژراوی له‌ گه‌ڕه‌كی واستی و نزیك شوقه‌كانی غاز، له‌ نێو هه‌یكه‌لێكی خانوودا دۆزییه‌وه‌ كه‌ به‌ گولله‌ كوژرابوو.

وتیشی: "كوژراوه‌كه‌ ناوی (ج - ر)ه‌و له‌ ئێستادا ته‌رمه‌كه‌ی ره‌وانه‌ی پزیشكی دادوه‌ری كراوه‌و لێكۆڵینه‌وه‌ش ده‌ستی پێكردووه‌.

له‌ لایه‌كی دیكه‌وه‌ هه‌ر ئه‌مرۆ سێشه‌ممه‌ هێزه‌كانی پۆلیسی كه‌ركوك، بۆمبێكی موگناتیسیان پوچه‌ڵكرده‌وه‌ كه‌ لكێنرابوو به‌ ئۆتۆمبێڵی كارمه‌ندێكی كۆمپانیای نه‌وتی باكور له‌ ناوچه‌ی باجوان .

هه‌روه‌ك هێزه‌كانی بنكه‌ی پۆلیسی ئازادی به‌ هاوكاری پسپۆری ته‌قینه‌وه‌ (7) موشه‌كیان له‌ ناو گۆڕستانی گه‌ره‌كی موسه‌ڵادا، پوچه‌ڵكرده‌وه‌ كه‌ ئاماده‌كرابوو بۆ وه‌شاندن.